अखिल नेपाल ललितकला संघको संयोजनमा भएको प्रदर्शनीमा समाजवादोन्मुख नेपाली समाजको परिकल्पना गरिएको छ । संघका केन्द्रीय अध्यक्ष पाल्साङ्मो लामाले पार्टीको महाधिवेशनको सन्दर्भमा गरिएको कला प्रदर्शनीले नेपाली समाजको बहुआयामिकतालाई कलात्मक रुपमा उधिनेको बताए । उनले भने, ‘समाज रुपान्तरणका लागि कलाकारले कलामार्फत आफ्नो सिर्जनात्मक अभिव्यक्ति दिएका छन् । साथै नेपालको परिवर्तनकारी आन्दोलनमा माओवादी आन्दोलनको विशिष्ट भूमिका रहेकाले त्यसको झलक कलाकृतिमा आएको छ ।’
नेपाल ललितकला पत्रकार समाजका अध्यक्ष केशव राज खनालले नेपालमा समाजवादको विषय लिएर गरिएको पहिलो कला प्रदर्शनी रहेको धारणा व्यक्त गरे । उनले कलामार्फत राजनीतिक दिशा र परिवर्तनको विषयलाई कलाकारले कलाकृतिमार्फत प्रस्तुत गर्न सफल भएको जिकिर गरे । खनालले थपे, ‘देशलाई समृद्धि दिशातर्फ लैजान राजनीतिक नेतृत्वले विशिष्ट भूमिका खेल्नुपर्छ भन्ने सन्देश कलामा आएको छ । साथै प्रदर्शनीमा राखिएका कलामा नेपालको गणतान्त्रिक यात्राको प्रसंगलाई समेत कलात्मक रुपमा प्रस्तुत गरिएको छ ।’
प्रदर्शनीका लागि बुटवलबाट आएका कलाकार तथा अखिल नेपाल ललितकला संघ लुम्बिनी प्रदेश अध्यक्ष खेम बिकले सामाजिक न्यायसहितको समाजको परिकल्पना गरिएका कलाकृति प्रदर्शनीको मुख्य आकर्षक रहेको बताए । उनले नेपाली समाजमा चेतना भर्ने माओवादी आन्दोलनको विषयलाई कलाकारले निकै गहनताका साथ उठान गरेको विचार व्यक्त गरे । प्रदर्शनीमा परम्परागत थाङ्का तथा पौभा शैलीमा समाज परिवर्तन र सामाजिक न्यायको समसामयिक विषयलाई समेत कलात्मक रुपमा चित्रण गरिएको छ । शैलीका दृष्टिले नयाँपनको झल्को दिने गरी कलाकारले चित्र बनाएको सोफाजका अध्यक्ष खनालले बताए । उनले नेपालमा चलिरहेका कलाका शैलीमा यसरी सामाजिक न्यायका विषयलाई थाङ्का पौभा शैलीमा उतारेर कलाकारले नयाँपन दिन खोजेको जिकिर गरे । प्रदर्शनीमा अग्रज थाङ्का कलाकार लालमान लामाले उज्यालो यात्रा शीर्षकमा तयार पारेको चित्र प्रदर्शनीको आकर्षण बनेको छ । उनले नेपालको वर्गसंघर्ष या अन्य राष्ट्रभक्तिका आन्दोलन र युद्धमा नारीको सहभागिता र उनीहरुको योगदानको विषयलाई समेत चित्रमा उतार्ने कोशिस गरेको बताए । उनले भने, ‘नालापानी युद्धदेखि माओवादीले सुरु गरेको जनयुद्धमा महिलाको विशिष्ट र बहादुरीपूर्ण योगदान रहेको छ । मैले चित्रमा त्यो प्रसंगलाई उतार्ने जमर्को गरेको हुँ ।’
० प्रदर्शनीमा आन्दोलन, गणतन्त्र, जनजीविका, श्रम, मजदूर, वित्तीय पुँजीवाद र त्यसको असर, कृषि क्रान्ति, सामाजिक न्याय र विभेदरहित समाजको परिकल्पना गरिएका कलाकृति राखिएको छ
० कलामा मजदूर, किसान, न्यायपूर्ण आन्दोलन र समानताका विषयलाई निकै बोधगम्य रुपमा उतारिएको छ
० सामाजिक रुपान्तरण र अग्रगामी राजनीतिक आन्दोलनलाई कलाकृतिमार्फत कलाकारले सैद्धान्तिक आधार दिने प्रयत्न गरिएको छ
पौभा शैलीमा राजनीतिक तथा सामाजिक विषयमा कलाकार राजकुमार राना मगर, अमिर शाक्यले निकै आकर्षक चित्र बनाएका छन् । उनीहरुका कलामा मजदूर, किसान, न्यायपूर्ण आन्दोलन र समानताका विषयलाई निकै बोधगम्य रुपमा उतारिएको छ । यस्तै, कलाकार पाल्साङ्मो लामा, झिग्मे लामा, कमानसिंह लामा तथा निरीमाया लामाले थाङ्का शैलीमा नयाँ कला शैलीको आरम्भ गरेका छन् । यो महाधिवेशनले नेपाली कलामा नयाँ बहस छेडेको प्रदर्शनीमा सहभागी कलाकार तथा संघका केन्द्रीय सचिव निरीमाया लामाले बताइन् । उनले नेपाली समाजको अग्रगामी रुपान्तरणका लागि योगदान दिने सबै सहिद, बेपत्ता तथा घाइते योद्धाको सम्मान गर्दै आगामी दिनमा सिर्जनामार्फत संघले काम गर्ने प्रतिबद्धता जनाइन् ।
मुगुका कलाकार तथा संघका कर्णाली प्रदेश सहसंयोजक झिग्मे लामाले समाजवादी यात्राको पदचाप शीर्षकमा मुगाली शैलीमा हिमाली परिदृश्य र समाजलाई उतारेको चित्र प्रदर्शनीमा राखेको बताए । उनले नेपाललाई शान्ति र समृद्धिको दिशामा लैजाने राजनीतिको नेतृत्व गरेको पार्टीको महाधिवेशनमा कलाकारलाई कला प्रदर्शनीको अवसर दिएर माओवादीले राम्रो काम गरेको सुनाए । संघका केन्द्रीय अध्यक्ष पाल्साङ्मो लामाले प्रदर्शनीमा तराई मधेश, पहाड तथा हिमाली परिवेशका विविध आयाम झल्किने कलाकृति राखिएको जानकारी दिए । उनले नेपालको समाजवादी यात्राका लागि यो कला प्रदर्शनी कलाका दृष्टिले कोशेढुंगा सावित हुने जिकिर गरे । उनले नेपालमा समाजवादी कलाको यो प्रदर्शनी पहिलो भएको दावीसमेत गरे ।
संघका केन्द्रीय उपाध्यक्ष प्रदीप अधिकारीले सामाजिक रुपान्तरण र अग्रगामी राजनीतिक आन्दोलनलाई कलाकृतिमार्फत कलाकारले सैद्धान्तिक आधार दिने प्रयत्न गरेको विचार राखे । उनले भने, ‘नेपालको प्रगतिशील तथा समाजवादी कला आन्दोलनका लागि यो प्रदर्शनी कोशेढुंगा सावित हुनेछ । साथै यसप्रकारको प्रदर्शनी नेपालमा पहिलो पटक भएको हो ।’ प्रदर्शनीमा कलाकार रविन्द्र श्रेष्ठले जनमुक्ति सेना र नेपाली सेनाको रगतबाट बनाएको चित्रले शान्ति समायोजनको विषयलाई कलात्मक रुपमा प्रस्तुत गरेको छ । कलाकार श्रेष्ठ शान्ति समायोजनपछि नेपाली समाजले समृद्धिको यात्रामा फड्को मार्ने भएकाले त्यस दिशामा अग्रसर हुन राजनीतिक दललाई आग्रहसमेत चित्रमार्फत गरेका छन् ।
000
www.souryaonline.com बाट साभार
सौर्य अनलाइन२०७८ पुष १२ गते प्रकाशित
No comments:
Post a Comment